快餐冒險 ─ 雪白火鍋蔬菜多，獸王兩重天 Custom

嘩！唔得了！今期快餐冒險竟然有特別嘉賓亂入，同我搶食！可怒也！真金白銀比錢試菜寫報告，竟敢偷我食？一於拍低相擺上網！各位朋友，一齊歡迎今期特別嘉賓 ─ 「小飛飛」！請拍掌！

小飛飛係我碟清乾的肥牛上流連了一分鐘，無動手，就飛走了，唔知係咪嫌無肉食，睇唔上眼，佢可能係飛飛界的食家？介紹完特別嘉賓，我們正式開始今期快餐冒險！

注意：產品內容及定價只供參考，一切店家公告為準！

今期挑戰係大加落新出品的邊爐，例牌又有學生大忌「Don't 升班」同好刀功薄切肥牛。料方面，選了最普通的肥牛雜錦鍋。所謂紅白，就係指新出的紅白兩種湯底，二選一，放棄紅色的泡菜湯底，選了白色的豆乳湯底，四十三個大洋，加多杯飲品，繼續一貫加落精神，「只」加六蚊。

首先，新鍋特別靚仔，各位姐姐都很熱心，埋位不夠二十秒已經有姐姐拿爐來。醬料有三種，豉油、辣椒金蒜和疑似沙嗲醬，三者都很好味，如果再加上生蒜就完美。

先睇睇咩料？肥牛有六大塊，非食肉獸勉強可以，食肉獸，想流淚。其他雜錦，主要是菜，正確點，係墊底菜。兩大件疑似山根，一份烏冬，好豐富好多菜呀！豐富到丸都冇粒，菜多肉少，真清爽！ 雪白的湯底，賣相非常討喜，味道淡淡中有點香，腐竹味和豆味香濃，配肥牛效果幾好，牛肉灼後有種幼滑感，淡味可以用醬料搭夠，完全OK！

牛肉本身質素可以，見唔到有冰粒，亦有肉味，最少唔似爛地布。最正係烏冬，因為加上灼肥牛後的油，比在一般日本烏冬店吃的豆乳烏冬更香濃更有層次感，唯一缺點，係湯面有一層油，唔介意食油的話，真係幾一流。其他配料，都係菜都菜，OK新鮮，正常好味。

食完，70%飽，加料要十幾廿蚊，我驚真係要食飽落樓要成百蚊，淺嘗算了。最後，杯泰式咩咩冰，唔係太大杯，味道還好，唔係得梳打水味，不過，可唔可以大杯少少？好，NEXT！

---

包王上期個挑‧戰三重牛，名過其實，吹水無實際，食到唔上唔落，今期滿足肉望，整番個「獸王二重天CUSTOM」。叫法，好簡單，就係華堡餐，加牛肉(加十蚊)，加雙重芝士(加四蚊)，再加煙肉(加兩蚊)，卒之埋單成五草野，加少少可以去Outbreak，ORL。

始終包王分店多，唔係太肚餓，但獸欲強的日子，不失係一個唔錯選擇，因為有少少燒味，又有厚茄，層次感最比老M的「雙重足三兩」好得多，當然價錢都係！