暗黑blog論《新章》 ─ 等價交換三字文

黑仔、影居士：「人做我又做，專點條黑路！」

黑仔：「老闆，2007年第一篇BLOG論未開波就好多爛茄飛緊過來，今晚宵夜唔憂無得食！」

影居士：「無計，見到「等價交換」哩四隻字，大家以為又炒冷飯呀麻！」

黑仔：「咁老闆你又確係久不久就翻叮哩個名詞，講來講去果幾個point，睇到都唔開胃喇。」

影居士：「今日blog論講既係blog界名物「三字文」。文如其名，字數極其稀少，簡單點講，即係以前係論壇張貼隨時會被人禁言同指責果種。」

黑仔：「咁耐都未到題，難得有人投訴話你口水多，浪費網路資源，重......」

影居士：「係咪紅左就囂呀？聽日唔想番工？睇到哩度，無耐性者，或忍夠者，請直跳至最後一段 ！」

黑仔：「老闆多才多藝長短皆精英明神武宇宙無敵......」

影居士：「好喇，三字文係一種獨特的blog文體，內容似無還有，深度若有若冇，但，三幾個字之間，可以引出千百字的留言，箇中之妙，實在玄之又玄，令不少三百字文、三千字甚至三萬字文者大惑不解，莫明其妙，本居士近日四出探索，苦心鑽研，為各位立志轉營三字文之壯士出謀獻策，不收分文......」

黑仔：「老闆，對話體好難睇，轉番論文體得唔得呀？」

影居士：「今次算你叻仔，又好。」

三字文者指一些內文短少精悍的blog文，事實上不止三字，大多也有一句至兩句，通常都會在一百字以下，詐聽之下很簡單，但，一篇成功的三字文，每每可以引來數以十計或百計的留言，要留言的字數更勝文章內容，方為一篇成功的三字文，要達到這境界，就不是簡單的事。

有人覺得三字文付出少、效益大，真係？我又分析，要完成一篇成功的三字文，首先要有最重要成份，當然，是一個blog，而更重要的，是人緣或名氣，後者對我地哩聽凡人冇用，有名氣的人，如大名星或名作家，睇哩篇簡直係浪費時間，所以略過。至於人緣呢？通常有幾個方案：1. 朋友 2. 其他blogger ，如果素昧平生，更要花時間去聯繫跟交流，才可以令對方對發文blogger感興趣甚至產生歸屬感，這正是三字文的留言的等價交換。當然，利誘或名誘係另一個快速增加"朋友/戰友"的良好方法。

對！三字文的成功就是以blogger的交誼或各種利益來交換(黑仔:車！又講哩聽阿媽係女人的廢話)，如果計算綜合花費時間/資源，成功的三字文付出不一定比專寫文少。不太受文章本身的質素影響，而較受blogger的交誼能力影響，這點也是交誼形blog容易冒起的原因，反之，難以像專題blog般因"爆文現像"(本篇太長，這個下篇才講)快速增長，另外，成功的交誼形BＬＯＧ每每都是生活感覺雜寫形。

再說我研究出的三字文三大忌：一忌專門，二忌冷門，三忌偏激，最緊要大家開心，內容要做到雅俗共賞，人人可以看得明白看得舒服，所以生活感受或近況是三字文的常用題目，而內容盡量中性，偏激的話會趕客或令別人不安，總之最緊要係人人開心，若冇所得，都唔好得失人。一大篇，說到尾，成功的三字文BLOG絕對不容易，各有前因莫羨人，大家只是付出的方法不同。我那個轉營寫三字文的偉大夢想？算吧，BLOG情不合，唔係我財唔入我袋呀！